Ek Fikr Fikrmando ke liye ?

" Consciousness " yeh ek english ka lafz hai jisko urdu me " Shaoor " tarjuma kiya jata hai. 

Har madda kya khud me ek shaoor rakhta hai ? Jaise pathar jisko tasawwur yeh kiya jata hai ki woh ek zinda cheez nahi hai. Per kya woh waqai ek zinda cheez nahi hai ? agar woh zinda nahi hai to usko rock shape me nahi dhool ki shakal me hona chahiye tha. Yani ek patthar ko patthar ki shakl me bane rahne ke peechay uske andar ek hosh maujood hai jo usko sakht banaye hue hai. Lekin yahan us zarre per mazeed baat aake atak jayegi jo sabse chota hai jaise Electrons , protons , Neutrons aur mazeed usse chota jaise Bosons aur mazeed chota jisko Quarks kaha jata hai. Filhaal science abhi tak yehi define kar saki hai ki Quarks sabse chote hain jo apas me Positive Negative milke Higgs Boson banate hain aur yehi woh particles hain jo zimmedar hain kisi bhi cheez ke wujood me jo hamare aas paas hoti hain.

Ab sawaal yahan se shuru karte hain .. Kya Quarks Shaoor rakhte hain ? 

Pahle ke log apna data patharon per , janwaron ki khalon per likhke rakhte the. Per ab kyonki insani dimagh ne kai ilmi pahaad uboor kar liye hain to wohi data ab woh CD / DVD / HDD / SSD me save karke rakhta hai. Per kya humne kabhi socha ki yeh CD / DVD / HDD / SSD kin cheezon se banti hain ? Woh cheezein is duniya me kab aayi ? unke andar yeh shaoor kaise agaya ki woh itna sara data save rakh sakti hain aur jab zaroorat pade woh usi data ko wapas de deti hain. Yeh salahiyat un materials me kahan se aayi ki woh data ko store kar sakein ?

Yeh khila jo duniya me hai aur duniya se bahar bhi maujood hai woh kabse hai ? Hazaron lakhon saalon se. Yani insaan jo kaam aaj kar raha hai wohi woh pahle din karta jab duniya banke tayyar hui to bhi yeh sare metrial wohi kaam karte jo aaj kar rahe hain. Yeh khila us waqt bhi wohi salahiyat rakhta tha jo aaj rakhta hai yani Mobile se data ko radio frequency ke zariye idher se udher le jaane ka. 

James Webb Space Telescope duniya se 1 Million miles ki doori khila me sun ke chakkar laga raha hai. 1 Millon miles = 1609344 Kilometer itni doori se woh 28 Mbps ki speed se khila ki tasveer NASA ke server per upload karta rahta hai.

Yani har cheez us waqt se salahiyat rakhti thi jabse woh wujood me aayi. Yeh insaan ka dimagh tha jo dheeray dheeray apne urooj ki taraf badh raha hai. 

Apne rab ko samajhne ke liye behad zaroori hai ki soch ko complex circuit me le jaya jaye aur samjha jaye ki kyon Imam Ali (as) jaisi shakhsiyat yeh kahti milti hai ki main teri ibadat dozakh ke khuaf se nahi aur na jannat ki laalach me karta hoon , balki tujhe laeke ibadat samajhta hoon.